Ali Məhkəmədə qəsdən adam öldürməyə cəhddə ittiham edilən Əli Vəliyevin (ad soyad şərtidir) barəsindəki qərardan verilən kassasiya şikayəti üzrə məhkəmə iclası başa çatıb.
Pravda.аz xəbər verir ki, hakim Şahin Yusifovun sədrliyi ilə keçirilən prosesdə qərar elan olunub. İttihama görə, Ə.Vəliyev Gəncə şəhəri, Gülüstan qəsəbəsində yerləşən ünvansız fərdi yaşayış evində yaşayan Həsən Quliyevi (ad soyad şərtidir) qəsdən öldürmək məqsədilə ona qarşı ağır cinayət törətməyə cəhd edib.
Məhkəmə tərəfindən müəyyən edilib ki, zərərçəkmiş şəxs onunla qonşuluqda yaşayan təqsirləndirilən şəxsin bacısına müxtəlif bəhanələrlə mobil telefon vasitəsilə zəng edərək qadını narahat edib, onunla yaxın münasibətlər qurmaq istəməsini deyib. Ə.Vəliyev isə bu vəziyyəti qəbul etməyərək, qisas almaq niyyəti ilə qısqanclıq zəminində H.Quliyevi qəsdən həyatdan məhrum etmək qərarına gəlib
Əli zərərçəkmiş şəxslə bacısı arasında olan münasibətləri aydınlaşdırmaq bəhanəsi ilə ona yaxınlaşıb. Həsənin bacısına zəng etdiyini inkar etməsi və məhkumdan hansı səbəbdən yaşadığı ünvana gəldiyini soruşması sonuncunu qəzəbləndirib. Bu zaman məhkum bacısının evindən gizli şəkildə götürərək üzərində saxladığı bıçağı çıxarıb və zərərçəkmiş şəxsi öldürmək niyyətini tam qətiləşdirib. İttihama görə, Ə.Vəliyev qəsdən H.Quliyevə bir neçə bıçaq zərbəsi endirib. Nəticədə zərərçəkmiş şəxsə 4 ədəd deşilmiş-kəsilmiş yara xəsarəti yetirilib. Zərərçəkmiş ailə üzvləri tərəfindən xəstəxanaya çatdırılıb və həyatı xilas edilib.
Gəncə Ağır Cinayətlər Məhkəməsinin hökmü ilə Ə.Vəliyev 7 il 10 ay 15 gün müddətə azadlıqdan məhrum edilib. Gəncə Apellyasiya Məhkəməsi onun apellyasiya şikayətini təmin etməyib.
Ali Məhkəmə də onun kassasiya şikayətini təmin etməyib.
