Etibarnamə ilə avtomobil idarə edən Gəncə sakininin maşını əlindən alınıb.
Bu barədə Gencexeber.az-a şikayətçi Elşən Hüseynov məlumat verib. O iddia edir ki, dörd il bundan öncə “VAZ-2107” markalı avtomobili Tofiq Həsənov adlı şəxsdən 3 300 manata alıb. Amma bu illər ərzində Hüseynov avtomobili öz adına rəsmiləşdirməyib.
Sonuncu dəfə avqustun 5-də etibarnamənin yenilənməsi ilə bağlı müraciət etdiyində, avtomobilin rəsmi sahibi onu Gəncə Şəhər Dövlət Yol Polisi İdarəsinə çağırıb. Polis əməkdaşları Tofiq Həsənovun banklardan birinə 6 000 manat borcu olduğu üçün avtomobilə həbs qoyulduğunu bildiriblər. Daha sonra maşın ondan müsadirə olunaraq cərimə meydançasına aparılıb:
“Mən Tofiq Həsənova 3 300 manat ödəmişəm. Hazırda avtomobili geri ala bilmirəm. Mən maşını maddi durumum əlverişli olmadığı üçün illərdir etibarnamə ilə sürmüşəm. Həsənov buna görə hər dəfə məndən 20 manat “şirinlik” də alıb”.
Polisdən Elşən Hüseynova bildirilib ki, 6 min manat tam ödənilənə kimi o, maşını geri götürə bilməz.
