Gəncədə təhsil ocağı xarici universitetlə anlaşıb. Bu haqda 23 iyul tarixində ATU-ya istinadən məlumat veririk.
Azərbaycan Texnologiya Universitetinin (ATU) nümayəndələri İspaniyanın Qranada Universitetində olublar. Təhsil ocaqları arasında memorandum bağlanıb. Sənədi ATU-nun rektoru vəzifəsini müvəqqəti icra edən Yaşar Ömərovla Qranada Universitetinin rektoru Pedro Mercado Pacheco imzalayıblar.
Burada bildirilib ki, 2023-cü ilin may ayında bağlanmış müqavilə ilə bir müddətdir ki, Erasmus proqramı çərçivəsində müəllim və tələbə heyətinin mübadiləsini həyata keçirilir. Yeni anlaşma ilə mövcud əməkdaşlığın bir neçə istiqamət üzrə daha da genişləndirilməsi nəzərdə tutulur. Sənəddə birgə elmi konfransların, layihələrin həyata keçirilməsi, tələbə və müəllim mübadiləsinin bundan sonra da davam etdirilməsi və s. öz əksini tapır.
Səfər çərçivəsində ATU nümayəndə heyəti QU-da infrastruktur, fakültələrin maddi texniki bazası, həyata keçirilən elmi işlər və tədris prosesinin təşkili ilə yaxından tanış olublar.
Qeyd edək ki, İspaniyaya yollanan əməkdaşların arasında Yaşar Ömərovla yanaşı, strateji inkişaf və rəqəmsallaşma məsələləri üzrə rektor müşaviri Mehman Kərimov və Qida mühəndisliyi fakültəsinin dekanı Mehman İsmayılov da yer alıblar.
