Gəncə şəhərində növbəti şəhid torpağa tapşırılıb. Bu haqda 2 avqust tarixində Kəpəz televiziyasına istinadən xəbər veririk.
Birinci Qarabağ müharibəsində itkin düşdüyü hesab edilən Daşkəsən şəhidi Surxay Məmmədov dəfn edilib. Burada Daşkəsən Rayon ictimaiyyəti, şəhidin yaxınları, şəhid ailələri, müharibə veteranları və əlilləri iştirak ediblər. Onun nəşinin qalıqları İsmayıllı Şəhidlər xiyabanında dəfn olunan naməlum şəhid qəbirlərində aşkar edilib.
“Qardaşım 1993-cü ilin fevral ayında Ağdərə istiqamətində, Mehmanə kəndində itkin düşdü. Ali baş komandan İlham Əliyevə təşəkkürümüzü bildiririk”, – deyə şəhidin qardaşı bildirib.
Qeyd edək ki, şəhid Surxay Rza oğlu Məmmədov 7 dekabr 1974-cü ildə Daşkəsən rayonunun Qabaqtəpə kəndində anadan olub. O, könüllü olaraq Qarabağda gedən döyüşlərə qatılıb. 8 fevral 1993-cü ildə Ağdamda gedən döyüşlərdə hərbi xidmət borcunu yerinə yetirərkən müqəddəs şəhidlik zirvəsinə ucalıb.
