Azərbaycan Dövlət Aqrar Universiteti (ADAU) və Türkiyənin Ege Universiteti arasında həyata keçirilən beynəlxalq ikili diplom proqramı çərçivəsində Azərbaycan və Türkiyənin zəngin ədəbi-mədəni irsini əks etdirən xüsusi tədbir təşkil olunacaq.
Gencexeber.az bildirir ki, tədbir sabah ADAU-nun Aqronomluq və Zoomühəndislik tədris korpusunda keçiriləcək.
"Tək ürək, iki coğrafiya – yazılan unudulmaz şeirlər" adlı mədəniyyət gecəsində iki qardaş ölkənin görkəmli şair və yazıçılarının yaradıcılığından seçilən şeirlər səsləndiriləcək, onların sözlərinə bəstələnən mahnılar ifa olunacaq. Eyni zamanda tədbir çərçivəsində Azərbaycan və Türkiyənin milli rəqsləri təqdim ediləcək.
Tədbirin əsas məqsədi Azərbaycan və Türkiyə xalqlarını birləşdirən ortaq ədəbiyyat, dil və mədəniyyət dəyərlərini tələbələrə daha yaxından tanıtmaq, iki ölkə arasında mövcud olan qardaşlıq və dostluq münasibətlərini daha da möhkəmləndirməkdir.
