Azərbaycan Dövlət Aqrar Universiteti (ADAU) universitetin institusional kimliyini, aqrar təhsil və elmi-tədqiqat fəaliyyətini, innovativ və müasir yanaşmasını əks etdirən yeni loqo dizaynının hazırlanması məqsədilə müsabiqə elan edir.
Gencexeber.az bildirir ki, müsabiqə çərçivəsində təqdim olunacaq loqoların orijinal olması, müəllif hüquqlarını pozmaması və digər qurumların brendlərini təkrarlamaması tələb olunur. Dizaynların həm çap, həm də rəqəmsal mühitlərdə istifadəyə uyğun olması, ölçü dəyişikliklərində keyfiyyətini itirməməsi və ADAU-nun uzunmüddətli brend strategiyasına cavab verməsi əsas şərtlər sırasındadır.
Loqo dizaynı sadə, lakonik və funksional olmalı, rəng istifadəsi balanslı və rəsmi üsluba uyğun seçilməlidir. Dizaynda aqrar sahə, elm, təhsil və inkişaf anlayışları ilə assosiasiya yaradılması vacibdir.
İştirakçılar loqolarını mütləq vektor formatlarda (AI, EPS, PDF) təqdim etməli, əlavə olaraq PNG və JPG/JPEG formatlarında fayllar göndərməlidirlər. Qara və ağ versiyalar tələb olunur.
Loqo dizaynları və tələb olunan bütün materiallar press@adau.edu.az elektron poçt ünvanına göndərilməlidir.
Müsabiqənin qalibi olan loqo dizaynının müəllifi mükafatlandırılacaq.
