Qəbul imtahanında yüksək bal toplasalar da, region universitetlərini seçən abituriyentlərin sayı heç də az deyil.
Azedu.аz həmin tələblərdən biri olan 606,2 bal toplayaraq Gəncə Dövlət Universitetinin Xarici dil müəllimliyi (ingilis dili) ixtisasına qəbul olmuş 1-ci kurs tələbəsi Nuray Xəlilzadədən müsahibə alıb. Müsahibədə onun bu universiteti seçməsinin səbəbləri, tələbə həyatı və gündəlik təcrübələri haqqında maraqlı söhbət apardıq.
Nuray Xəlilzadə Goranboy Rayonunun Düzqışlaq kəndində anadan olub və burada təhsil alıb.
- Bu ixtisası seçməyində hansı amillər rol oynayıb?
- Anam müəllimədir və o, mənim gözümü açıb gördüyüm ilk müəllim olub. Bu, mənim ingilis dili müəllimliyi ixtisasını seçməyimə xüsusi təkan verdi. Həm universitetin dərs metodikası, həm də ailəmə yaxın olmaq istəyim bu seçimi dəstəklədi.
- Topladığın balı ilk olaraq kimlə bölüşdün? Yüksək bal toplayacağını gözləyirdinmi?
- Evdə bütün ailə bir yerdə idik. Nəticələri öyrənəndə tez baxdım və sevincimi ailəmlə paylaşdım. Yüksək bal toplayacağımı gözləyirdim.
- Sosial şəbəkələrdən istifadə edirsənmi?
- Orta məktəb dövründə heç bir sosial şəbəkədən istifadə etmirdim. İndi isə boş vaxtlarımda saytlara daxil olub məlumatlar əldə edirəm.
- Bəs sinif yoldaşlarınla əlaqəni necə saxlayırsan?
- Həm Vatsapla əlaqə saxlayırıq, həm də tez-tez görüşürük.
- Hobbilərin nələrdir?
- Piano çalmağı və kitab oxumağı çox sevirəm.
- Gələcək planların nələrdir?
- Bakalavr təhsilimi başa vurduqdan sonra magistratura təhsili almağı düşünürəm. Həmçinin növbəti illərdə könüllülük fəaliyyəti ilə də məşğul olmaq niyyətindəyəm.
- Universitet seçimindən razısan?
- Bəli, qərarımdan çox razıyam. Universitet həyatı gözəl keçir və dərslərimə məsuliyyətlə çalışıram.
