Tanınmış alim, Azərbaycan kimya elminə özünə məxsus töhfələr vermiş Eldar Məmmədbəyli 85 illiyini qeyd edir.
Görkəmli alim Məmmədbəyli Eldar Hüseynqulu oğlu 1941-ci ilin yanvar ayının 22-də Gədəbəy rayonunun Arısu kəndində müəllim ailəsində anadan olub. 1957-ci ildə Gədəbəy rayonunun Miskinli kənd orta məktəbini bitirib.
1960-cı ildə N.Nərimanov adına Azərbaycan Tibb İnstitutunun (indiki Azərbaycan Tibb Universiteti) əczaçılıq fakültəsinə daxil olub. 1965-ci ildə oranı provizor ixtisası üzrə bitirmiş, təyinatla 1967-ci ilə kimi ixtisası üzrə işləyib. Həmin ildə E.Məmmədbəyli Az.SSR Elmlər Akademiyasının Neft-Kimya Prosesləri İnsitutunda (NKPİ) istehsalatdan ayrılmaqla (əyani) aspiranturaya daxil olub.
1978-ci ildə SSRİ Elmlər Akademiyasının Element-üzvi Birləşmələr İnstitutunda (EÜBİ) namizədlik dissertasiyasını müdafiə edərək kimya elmləri namizədi alimlik dərəcəsini alıb. 2005-ci ildə Bakı Dövlət Universitetinin nəzdindəki Dissertasiya Şurasında "C4-C5 -Qoşulmuş dienlərin aktivləşdirilmiş dienofillərlə asimmetrik Dils-Alder reaksiyası" mövzusunda "Üzvi kimya" ixtisası üzrə doktorluq dissertasiyasını müdafiə edərək, kimya elmləri doktoru alimlik dərəcəsini alıb. 1967-ci ildən 2007-ci ilə kimi kiçik elmi işçi vəzifəsindən baş elmi işçi vəzifəsinə qədər yüksəlib.
2008-ci ildə isə yeni yaradılmış "Optiki aktiv maddələrin sintezi və tədqiqi" qrupuna rəhbər təyin edilib. 2012-ci ildə yeni təsis edilmiş "Antimikrob təsirli reagentlər və biozədələnmələrin tədqiqi" laboratoriyasına müdir təyin olunub.
Geniş intellektə, müasir dünyagörüşə malik, yüksək ixtisaslı mütəxəssis olan professor Eldar Məmmədbəyli üzvi kimya, neft kimyası, asimmetrik sintez, sulfatreduksiyaedici bakteriyalar əleyhinə antimikrob maddələrin sintezi və xassələrinin tədqiqi sahəsində özünəməxsus elmi istiqamət yarada bilib. Hazırda o, bu istiqamətdə fəal tədqiqatlarını uğurla, gənclik həvəsi ilə davam etdirir.
E.H.Məmmədbəyli elmi əməkdaşlıq çərçivəsində Respublikanın ali təhsil müəssisələrinin (Azərbaycan Dövlət Pedoqoji Universiteti, Gəncə Dövlət Universiteti, Azərbaycan Tibb Universiteti) və elmi-tədqiqat institutlarının (Polimer Materialları İnstitutu, Kataliz və Qeyri-Üzvi Kimya İnstitutu, Aşqarlar Kimyası İnstitutu, Mikrobiologiya İnstitutu) əməkdaşları ilə birgə elmi işlərin aparılmasında fəal iştirak edir.
İşlədiyi dövrdə 660-dan çox elmi əsəri dərc olunub. Bunlardan 12-si SSRİ müəlliflik şəhadətnaməsi, 5-i Azərbaycan patenti, 4-ü monoqrafiyadır. Məqalələrinin bir çoxu "Tetrahedron", "Green Chemistry", "ЖOpX", "ЖОX", "ЖПХ", "Нефтехемия", "Катализ в промышленности", "Известия РАН, "Сер. Хим.", "Аналитическая химия", "Azərbaycan kimya jurnalı", "Neft kimyası və neft emalı prosesləri", "Kimya problemləri" kimi jurnallarda dərc olunub. Son beş ildə 170 elmi əsər dərc edilib.
Eldar Məmmədbəylinin rəhbərliyi ilə doqquz fəlsəfə doktoru, üç elmlər doktoru dissertsiya işləri müdafiə olunmuşdur. Hazırda onun rəhbərliyi altında bir neçə əməkdaş fəlsəfə doktoru və elmlər doktoru elmi dərəcəsini almaq üçün dissertasiya işi üzərində işləyir.
Uzunmüddətli uğurlu elmi fəaliyyəti nəzərə alınaraq prof. E.Məmmədbəyli AR-nın Prezidenti İlham Əlievin 1452 saylı 1 oktyabr 2019-cu il tarixli sərəncamı ilə "Tərəqqi" medalına layiq görülüb.
Azərbaycan Milli Elmlər Akademiyasının 80 illik yubileyi münasibətilə Azərbaycan elminin inkişafında xidmətlərinə görə AR-nın Prezidenti İlham Əlievin 5 noyabr 2025-ci il tarixli sərəncamı ilə "Azərbaycan Respublikası Prezidentinin fəxri diplomu"na layiq görülüb.
