Göygöl rayonunun Yeni Qızılca kəndinin sakinləri illərdir içməli su problemi ilə üz-üzədirlər.
Gencexeber.az-a daxil olan şikayətlərə əsasən, kəndin bir hissəsi hələ də dayanıqlı su təminatından məhrumdur. Sakinlərin sözlərinə görə, su qıtlığı o həddə çatıb ki, insanlar içməli suyu maşınlarla almaq məcburiyyətində qalırlar. Bəzən isə vətəndaşların ümidləri yağan yağışlardan sonra qrunt sularını nasoslarla çıxarmağa qalır.
Yeni Qızılca kəndini Gəncə–Göygöl–Daşkəsən avtomobil yolu iki hissəyə ayırır. Kəndin sağ hissəsində vəziyyət nisbətən qənaətbəxş olsa da, sol hissədə yaşayan ailələr illərdir susuzluqla mübarizə aparırlar. Onların sözlərinə görə, məsələ ilə bağlı dəfələrlə aidiyyəti qurumlara müraciətlər edilib, lakin problem hələ də həllini tapmayıb.
"Hər dəfə "tezliklə həll olunacaq" deyirlər, amma illər keçir, dəyişən heç nə yoxdur," – deyə sakinlərdən biri redaksiyamıza bildirib.
Hazırda Yeni Qızılcanın sol hissəsində 200-dən artıq ailə su qıtlığından əziyyət çəkir. Bəzi ailələr həyətlərində su saxlamaq üçün çənlər quraşdırıblar, lakin bu da daimi çıxış yolu sayılmır.
Məsələ ilə bağlı Göygöl Su-Meliorasiya Sistemləri İdarəsindən Gencexeber.az-a verilən məlumata görə, problemin aradan qaldırılması istiqamətində layihə hazırlanır. İlkin layihəyə əsasən, kəndin su təminatı üçün yeni mənbə Qoşqar çayından götürüləcək və əraziyə yeni su xətləri çəkiləcək.
Sakinlər isə ümid edirlər ki, bu dəfə vədlər real nəticə ilə yekunlaşacaq və illərlə davam edən susuzluq problemi nəhayət aradan qaldırılacaq.
