Gəncə sakini sosial şəbəkələrdə nalayiq ifadələrinə görə saxlanılıb. Bu haqda Gencexeber.az-a 20 yanvar tarixində məlumat daxil olub.
TikTok sosial şəbəkəsində bir nəfər qadın canlı yayım zamanı 20 Yanvar faciəsinin qurbanları barədə nalayiq ifadələr işlədib. Bu barədə Gəncə şəhər Baş Polis İdarəsində müvafiq araşdırma aparılıb.
DİN-in mətbuat xidmətinin Gəncə regional qrupunun baş inspektoru, polis kapitanı Eşqin Qasımovun redaksiyamıza verdiyi məlumata əsasən, keçirilən texniki axtarış tədbirləri nəticəsində həmin şəxsin Gəncə şəhər sakini Gülnarə İsgəndərova olduğu müəyyən edilib. O, 2-ci Polis Şöbəsinə dəvət olunub. Şöbədə həmin şəxslə profilaktiki söhbət aparılıb və bildirilib ki, 20 Yanvar faciəsi Ümumxalq Hüzn Günüdür və həmin gün şəhid olanlar bugünkü müstəqil dövlətimiz üçün canlarını qurban verənlərdir.
İsgəndərova ifadəsində etdiyi əməldən peşman olduğunu və bütün şəhid ailələrindən və Azərbaycan xalqından üzr istədiyini bildirilib. Faktla bağlı araşdırmalar davam etdirilir.
