Daşkəsən rayon sakini "102" Xidmətinə yalan məlumat verərək adam öldürəcəyini deyib.
Teleqraf.аz xəbər verir ki, Xoşbulaq kənd sakini, 1997-ci il təvəllüdlü Vəli Quliyev (ad və soyad şərtidir) ağır dərəcəli sərxoş vəziyyətdə "102" Xidmətinə zəng edərək adam öldürəcəyini bildirən məlumat verib.
Məlumat daxil olduqdan sonra polis əməkdaşları onun yaşadığı ünvana yollanıblar. Hadisə zamanı V.Quliyevin sərxoş vəziyyətdə ictimai asayişi pozduğu, ətrafdakı şəxsləri təhqir etdiyi və polis əməkdaşlarının qanuni tələblərinə tabe olmadığı müəyyən edilib.
Şəxs polis əməkdaşları tərəfindən saxlanılıb və barəsində inzibati xəta haqqında protokol tərtib olunub.
Məhkəmənin qərarı ilə V.Quliyev polisin qanuni tələbinə tabe olmama və ictimai asayişi pozma ilə bağlı 10 sutka inzibati həbs cəzası alıb.
