Hər il olduğu kimi, bu ildə bayram öncəsi əksər vətəndaşlar bölgələrdə istirahət etməyə üstünlük verirlər. Bu isə o deməkdir ki, Yeni il və digər bayram dövrlərində rayonlarda kirayə evlərinə tələbat artır.
Bəs görəsən, Yeni İl öncəsi bölgələrdə kirayə evlərinin qiyməti necədir?
Mövzu ilə bağlı əmlak eksperti Mülkədar Rüstəmov bakues.аz-a açıqlamasında bildirib ki, hər ilin dekabr ayından istirahət üçün xarici ölkələrdən Azərbaycana gələn vətəndaşlarımızın sayında artım hiss olunur.
Onun sözlərinə görə, xüsusən də Rusiyadan gələn vətəndaşlarımızın sayı daha çoxdur:
“Yeni İl ərəfəsində yerli turistlərin sayının artması fonunda daxili turizmdə canlanma yaşanır. Vətəndaşlarımız əsasən Quba, Qusar, Qəbələ, Göygöl və cənub bölgələrimizə daha çox üstünlük verirlər. Təbii ki, turist axını kirayə evlərinə olan tələbata və qiymətlərə təsirsiz ötüşmür. Bəzi hallarda bayram ərəfəsində günlük evlər 15-20 gün öncədən bron olunur”.
Rüstəmov qeyd edib ki, bayram öncəsi bölgələrdə günlük evlərin kirayəsi 100 manatdan 900 manata qədər dəyişir.
“Evin şəraitinə uyğun olaraq, bağ evlərində kirayə haqqı 900 manatdan yuxarı da ola bilər. Çünki bağ evlərinin şəraiti fərdi evlərlə müqayisədə daha yaxşı olur. Kirayə evlər 3-5 günlük, ən yaxşı halda isə 1 həftəlik götürülür. Kirayə haqqına bütün kommunal xidmətlər daxildir. Vətəndaşlarımız daha çox Quba, Qəbələ, İsmayıllı və Qusardan ev bron etməyə üstünlük verirlər. Xüsusilə də Qusara maraq daha yüksəkdir. Çünki burada istirahət mərkəzləri daha çoxdur və xidmət səviyyəsi keyfiyyətlidir”.
Ekspert onu da vurğulayıb ki, son 5 il ərzində bayram ərəfəsində hotellərə tələbat kəskin azalıb:
“Çünki son illər hotellərin xidmət rüsumları artıb. Ona görə də vətəndaşlar fərdi evləri kirayələməyi daha səmərəli hesab edirlər. Artıq bəzi hotellər müştəri cəlb etmək üçün müxtəlif kampaniyalar keçirməyə başlayıblar”.
