"Turan Tovuz" futbol klubu adının dəyişdirilməsi üçün AFFA-ya müraciət edib. Müraciətə qurumun İcraiyyə Komitəsinin dekabrın 17-də keçirilən iclasında baxılıb.
Bu haqda qol.аz saytının sorğusuna cavab olaraq qurumun mətbuat xidmətinin rəhbəri Elnur Məmmədli bildirib.
Klub əvvəlki adının - "Turan"ın bərpası xahişi ilə quruma müraciət edib.
E.Məmmədlinin sözlərinə görə, İK-nin iclasında bu müraciətə baxılıb və məsələyə müsbət yanaşılıb.
"Bununla bağlı hüquqi prosedurlar araşdırıldıqdan sonra kluba AFFA tərəfdən rəsmi cavab veriləcək" - deyə E.Məmmədli bildirib.
Qeyd edilib ki, vaxtilə borc məsələlərinə görə klub müxtəlif vaxtlarda bir necə oxşar adı sınayıb. Lakin Azərbaycanı avrokuboklarda təmsil edən ilk klub kimi “Turan” adı hamıya doğmadır. Bu səbəbdən rəhbərlik yenidən tarixi adı bərpa etmək üçün çalışır. İcraiyyə Komitəsinə də bununla bağlı lazımi sənədlər təqdim olunub.
Qeyd edək ki, ad dəyişikliyi həm də "Turan" adı altında faəliyyət göstərmiş klubun borclarını ödəməsindən sonra baş verə bilər.
Əlavə edək ki, hazırkı "Turan Tovuz"un hüquqi baxımdan "Turan" klubuna bağlılığı yoxdur.
