Xəbər verdiyimiz kimi, bu gün Gəncədə Ozan və Xudatbəy Rəfibəyli küçələrinin kəsişməsində yol-nəqliyyat hadisəsi baş verib. Son altı ayda sözügedən kəsişmədə 20-dən çox qəza meydana gəlib.
Vətəndaşların sözlərinə görə, yol-nəqliyyat hadisələrinin tez-tez baş verməsi lazımi yol tənzimləmə nişanlarının olmamasıdır. Sakinlər təhlükəsizliklərindən narahat olduqlarını bildirərək aidiyyəti orqanları müvafiq tədbirlər həyata keçirməyə çağırırlar.
Bu küçədə qəzaların qarşısının alınması istiqamətində hansı addımlar atıla bilər?
Mövzu ilə bağlı Gencexeber.az-a danışan Daxili İşlər Nazirliyinin (DİN) mətbuat xidmətinin Gəncə regional qrupunun baş inspektoru Eşqin Qasımov bildirib ki, sözügedən əraziyə Gəncə şəhər Baş Polis İdarəsinin Dövlət Yol Polisi şöbəsinin əməkdaşları tərəfindən baxış keçirilib.
“Ərazidə hərəkət intensivliyi və digər meyarlar diqqətlə öyrənilib və həmin ərazidə işıqfor quraşdırılması məqsədə müvafiq hesab olunmayıb. Onu da qeyd edim ki, ərazidə lazım olan digər yol nişanları var. Sürücülərdən bir daha xahiş və tələb olunur ki, həmin nişanların tələblərinə riayət etsinlər, özlərinin və digər hərəkət iştirakçılarının təhlükəsizliyinə biganə yanaşmasınlar”, - deyə qurum rəsmisi bildirib.
