İdman ayaqqabıları, geyimləri və avadanlıqları istehsalında ixtisaslaşmış Alman sənaye şirkəti “Puma”nın yeganə azərbaycanlı əməkdaşı, əslən Gədəbəydən olan Niyaməddin Bayramlı ilə oxucularımızı tanış edirik.
Niyaməddin Bayramlı kaspi.аz-а müsahibəsində bildirib ki, Azərbaycan dilindən əlavə rus, ingilis, türk, alman və çin dillərində də sərbəst danışır. Hər yerdə ölkəmizi tanıdır, “mən azərbaycanlıyam” deyir.
Hazırda “Puma”nın maliyyə departamentində maliyyə meneceri kimi fəaliyyət göstərən Niyaməddin Bayramlı Gədəbəyin Ərtəpə kəndində anadan olub. Uşaq ikən Rusiyanın Moskva şəhərinə köçüblər. Bağçaya və məktəbə orada gedib. Bakalavrı 2018-ci ildə Moskva Dövlət Regional Universitetinin iqtisadiyyat fakültəsində menecment ixtisası üzrə qırmızı diplomla bitirib.
Çinin Şanxay şəhərində Şanxay Maliyyə və İqtisadiyyat Universitetində beynəlxalq biznes ixtisasında magistratura təhsilini 84 faizlik müsbət göstərici ilə yekunlaşdırıb. Almaniyada ikinci magistratura təhsilini məhz maliyyə sahəsi üzrə alıb. Magistraturada təhsil almaqla paralel “Puma” şirkətində maliyyə departamentində işçi tələbə kimi işləməyə başlayıb. Magistraturanı bitirdikdən sonra elə “Puma” şirkətində ona iş təklif olunub. İki ildən artıqdır orada çalışır.
