Xalq artisti Məmmədrza Şeyxzamanov 4 avqust 1915-ci ildə Gəncədə anadan olub. O, şair Şeyx Nizaminin nəslindən olub.
Gencexeber.az məlumat verir ki, 1920-ci ildə Azərbaycan Xalq Cümhuriyyətinin süqutundan sonra Şeyxzamanovların mülkləri və zəngin kitabxanaları yandırılır. Məmmədrzanın atası Hacı İsa bəy vəfat edir. Anası isə yaşadıqları mülkü itirməmək üçün orada fabrik açılmasına icazə verir və əvəzində öz evindən bir otaq ala bilir.
Məmmədrza orta məktəbi bitirdikdən sonra Gəncədə İnşaat Texnikumunda təhsil alıb. O, burada dram dərnəyində tamaşalarda oynayıb. 15 yaşında ikən Məmmədrza Gəncədə "artist Məmmədəli" kimi tanınıb.
1934-cü ildə Gəncə Dövlət Dram Teatrının rejissoru Həbib İsmayılov Şeyxzamanovu teatra dəvət edir. O, burada ilk dəfə "Hind qızı" tamaşasında "Brahma" rolunda oynayır. Çalışdığı dövrdə Məmmədrza "Vaqif" (Eldar), "Fərhad və Şirin" (Fərhad), "Qaçaq Nəbi" (Nəbi) və digər tamaşalarda obrazlar yaradır.
Məmmədrza Şeyxzamanov bu filmlərdə müxtəlif obrazlar canlandırıb: "Qızmar günəş altında" (Alı kişi), "Leyli və Məcnun" (Dərviş), "Bir qalanın sirri" (həkim Eldostu), "Qatır Məmməd" (Gəncə qubernatoru), "Nəsimi" (Şeyx Əzəm), "Tütək səsi" (İsfəndiyar kişi), "Əhməd haradadır" (Şirin kişi) və s.
1974-cü ildə Məmmədrza Şeyxzamanov SSRİ Xalq artisti fəxri adına layiq görülüb.
Məmmədrza Şeyxzamanov 25 yanvar 1984-cü ildə Bakıda vəfat edib və Yasamal qəbiristanlığında dəfn olunub.
