Aşağı Quşçu Ayrım kəndinin bələdiyyə sədri Tofiq Hüseynov məktəbdə baş verən hadisə nəticəsində 20 nəfərin zəhərlənməsi ilə bağlı yayılan məlumatı təkzib edib.
Oxu.аz xəbər verir ki, o, açıqlamasında 10 uşağın tüstüdən zəhərləndiyini deyib:
"20 deyil, 10 uşaqdır. Elə də ciddi məsələ deyil", - bələdiyyə sədri əlavə edib.
12:07
"Tovuz rayon Aşağı Quşçu kənd 1 nömrəli tam orta ümumtəhsil məktəbinin 2 sinfində sobanın tıxanması tüstülünməyə səbəb olub".
Bu barədə Gencexeber.az-ın sorğusuna cavab olaraq Qazax-Tovuz Regional Təhsil İdarəsindən məlumat verilib.
Əlavə olunub ki, məktəbdə əvvəlcədən yanğın təhlükəsizliyi ilə bağlı görülmüş tədbirlər sayəsində hadisənin yayılmasının qarşısı alınıb, şagirdlər və müəllimlər təxliyə planına uyğun olaraq təhlükəsiz yerə təxliyə ediliblər.
"Tovuz rayonu üzrə təhsil sektorunun əməkdaşları hadisə yerindədir. Tüstülənmə nəticəsində 20 nəfərə yaxın şagird özünü pis hiss edib və təcili-tibbi yardıma müraciət edilib. Onların səhhəti diqqət mərkəzində saxlanılır. Hazırda aidiyyəti qurum tərəfindən hadisənin başvermə səbəbləri araşdırılır. Tədris prosesinin fasiləsizliyini təmin etmək üçün zəruri tədbirlər görülür", - deyə məlumatda qeyd edilib.
11:45
Tovuzda orta məktəbdə kütləvi zəhərlənmə olub.
Report.аz məlumat verir ki, hadisə rayonun Aşağı Quşçu kəndində yerləşən tam orta məktəbdə qeydə alınıb. Belə ki, məktəbin 15-dən çox şagirdi zəhərlənmə ilə xəstəxanaya aparılıb.
Onların yanacaq sobasının tüstüsündən zəhərləndiyi bildirilib.
Faktla bağlı araşdırma aparılır.
