Xəbər verdiyimiz kimi, Gəncə şəhərində fəaliyyət göstərən ictimai iaşə obyektlərində Qida Təhlükəsizliyi Agentliyi (AQTA) tərəfindən monitorinqlər aparılıb. Yoxlamalar zamanı "Kolorit" restoranında fritoz yağlarının vaxtında dəyişdirilməməsi də daxil olmaqla, 10-a yaxın nöqsan qeydə alınmışdı.
Gencexeber.az-a "Kolorit" restoranından bildirilib ki, artıq aşkar edilən nöqsanların hamısı aradan qaldırılıb və müəssisənin fəaliyyəti normativlərə uyğun vəziyyətə gətirilib.
Qeyd edilib ki, AQTA tərəfindən ictimailəşdirilən görüntülərdə müşahidə olunan mənzərə müvəqqəti xarakter daşıyıb və bu vəziyyət müəyyən texniki səbəblərdən yaranıb. Hazırda isə "Kolorit" restoranında xidmət keyfiyyətinin yüksəldilməsi, qida təhlükəsizliyi qaydalarının tam icra olunması və müştərilərə daha yaxşı xidmət göstərilməsi istiqamətində tədbirlər davam etdirilir.
