Gəncə şəhəri Mir Cəlal Paşayev adına 39 nömrəli tam orta məktəbin məzunu Şəmsinur Məmmədzadə böyük uğura imza atıb. O, Birləşmiş Dünya Kollecləri (United World Colleges – UWC) Milli Komitəsi tərəfindən keçirilən çoxmərhələli seçim prosesini uğurla keçərək 2025–2027-ci illərdə Kanadanın nüfuzlu "Pearson College UWC" məktəbində tam təqaüdlə təhsil almaq hüququ qazanıb.
"Azərbaycan müəllimi" uğurlu gənclə həmsöhbət olub.
Şəmsinur uğurunun arxasında dayanan səbəbləri belə izah edir:
"Uşaq vaxtından xaricdə ölkəmizi təmsil etmək istəyirdim. Özümü inkişaf etdirmək məni həmişə ruhlandırıb. Mənə görə, ən çətin mərhələ videomərhələ idi. Çünki müəyyən mövzu haqqında yalnız 1–2 dəqiqə danışmaq mümkün idi. Fikirləri bu qədər qısa vaxtda tam çatdırmaq heç də asan deyildi".
Proqram haqqında ilk dəfə yaxın qohumundan eşidən Şəmsinur indi həmin günün həyatında dönüş nöqtəsi olduğunu deyir:
"İlk dəfə bu məlumatı yaxın bir qohumumdan almışdım. O vaxtdan proqram diqqətimi çəkmişdi və hədəfimə çevrilmişdi. Bu yolda mənə dəstək olan ailəmə, dostlarıma, qohumlarıma, xüsusilə bacıma çox minnətdaram".
Şəmsinur uğurunun təkcə özünə aid olmadığını düşünür:
"Mənim uğurum Gəncədə oxuyan digər şagirdlərə göstərir ki, məqsəd qoyduqda və çalışdıqda imkanlar hamı üçün açıqdır. Onlara məsləhətim odur ki, özlərinə güvənsin, fürsətlərdən qorxmasın və daim öyrənməyə açıq olsunlar. Arzum yaxşı təhsil alaraq cəmiyyətə faydalı insan olmaqdır. Bu uğur həmin arzuma bir addım yaxınlaşdığımı göstərir".
