Gəncə şəhərindən olan idmançı pauerliftinq üzrə möhtəşəm uğura imza atıb.
Gencexeber.az-ın məlumatına görə, 2008-ci il təvəllüdlü Elnur Əliyev Rusiya Federasiyasının Moskva şəhərində keçirilən WRPF pauerliftinq üzrə 11-ci Dünya çempionatında çıxış edərək 17–19 yaşlılar arasında 60 kq çəki dərəcəsində bütün rəqiblərini geridə qoyub və dünya çempionu adına layiq görülüb.
Gənc idmançı yarışda aşağıdakı nəticələrə imza atıb:
"Squat" (çömbəlmə) – 162.5 kq;
"Bench press" (skamyada press) – 105 kq;
"Deadlift" (ölü çəkiləri qaldırmaq) – 180 kq.
Ümumilikdə 447.5 kq nəticə göstərən Elnur Əliyev bu göstərici ilə təkcə qızıl medal qazanmaqla kifayətlənməyib, həm də yeni dünya və Avropa rekordlarını qırıb. Sözügedən rekordlar WRPF-in rəsmi səhifəsində də təsdiqlənərək idmançının adı ilə tarixə düşüb.
Qeyd edək ki, dünya çempionu Gəncə şəhər Mirzə Şəfi Vazeh adına 16 nömrəli tam orta məktəbin məzunudur və hazırda Gəncə şəhərində yaşayır.
