Gəncə–Daşkəsən Regional Təhsil İdarəsinin qarşısında 29 saylı tam orta məktəbin bir qrup valideyni aksiya keçirib.
Gencexeber.az-ın məlumatına görə, valideynlər yeni tədris ili başlayandan etibarən məktəbdə rus bölməsində bir neçə fənn üzrə dərslərin keçirilmədiyini bildiriblər. Onların sözlərinə görə, 5-ci sinifdə riyaziyyat, 8-ci siniflərdə rus dili, ibtidai siniflərdə isə informatika fənlərindən müəllim yoxdur.
Şikayətçilər qeyd ediblər ki, dərslərin tədris olunmaması səbəbindən uşaqlar dərs saatlarında sinifdə boş qalır.
Aksiya zamanı valideynləri Gəncə–Daşkəsən Regional Təhsil İdarəsinin məsul şəxsləri qəbul ediblər. Valideynlərlə keçirilən söhbət zamanı idarə əməkdaşları tərəfindən bildirib ki, hazırda ölkə üzrə rus sektoru üzrə müəllim qıtlığı yaşanır.
Onların sözlərinə görə, müəllim çatışmazlığının qarşısını almaq məqsədilə keçid balı 30 bala qədər endirilsə də, yenə də vakant yerlər üçün müraciət edənlərin sayı az olub.
İdarə nümayəndələri çıxış yolu kimi valideynlərə uşaqlarını Azərbaycan bölməsinə keçirməyi, yaxud 29 saylı məktəbdən çıxararaq digər məktəblərə yerləşdirməyi tövsiyə ediblər.
"Yəni müəllim gözləməyin, gedin özünüz başınızın çarəsinə baxın", – valideynlərə bildirilib.
