Gəncədə ev heyvanları üçün ödənişsiz qısırlaşdırma aksiyası keçirilir
Azərbaycan Dövlət Aqrar Universitetinin (ADAU) Baytarlıq təbabəti fakültəsinin Baytarlıq klinikasında ev heyvanları üçün ödənişsiz qısırlaşdırma aksiyası keçirilir.
AZƏRTAC xəbər verir ki, aksiya peşəkar baytar cərrahlar və ixtisaslı mütəxəssislər tərəfindən yüksək tibbi standartlara uyğun şəkildə icra edilir.
Universitetin Baytarlıq təbabəti fakültəsinin dekanı Şəlalə Zeynalova əməliyyatların Baytarlıq təbabəti fakültəsinin dosenti, çoxillik klinik təcrübəyə malik baytar cərrah Telman İsgəndərov və beynəlxalq təcrübəli mütəxəssis, professor Kürşat Özer tərəfindən həyata keçirildiyini deyib:
"Mütəxəssislərin iştirakı aksiyanın peşəkar şəkildə, müasir klinik tələblərə və təhlükəsizlik protokollarına uyğun icra olunmasını təmin edir".
Sosial təşəbbüsün əsas məqsədi küçə heyvanlarının nəzarətsiz çoxalmasının qarşısının alınması, heyvanların sağlamlığının yaxşılaşdırılması, zoonoz xəstəliklərin yayılma riskinin azaldılması, eləcə də məsuliyyətli heyvan sahibliyinin təşviq edilməsi olub.
Bu gün start götürən aksiya sabah da davam edəcək.
