“Gəncədə tələbəni it dişlədi”. “Sahibsiz itlər məktəblilərə hücum etdi”. “İstirahət guşələrində itlər dəstə ilə dolaşır”. “Gəncədə 71 yaşlı qadını küçə itləri dişlədi”.
Və bu kimi daha neçə-neçə qorxu dolu xəbərlər...
Son bir il ərzində Gəncədə dolaşan sahibsiz itlər sakinlərin qorxulu yuxusuna çevrilib. Bu problem Azərbaycanın əksər bölgələrində olsa da, daha çox Bakı, Gəncə və Sumqayıt kimi iri şəhərlərdə aktualdır. Yerli mediada da tez-tez Gəncədə itlərin vətəndaşlara hücum etməsinə dair xəbərlər yayılır. Sakinlər iddia edirlər ki, onlar xüsusilə azyaşlıları qorxudur.
Elə Gəncə sakinlərindən redaksiyamıza daxil olan şikayətlərdən də müşahidə edirik ki, son 1 ay ərzində çoxlu sayda bu kimi hal qeydə alınıb.
Gencexeber.az məsələ ilə bağlı TƏBİB-ə sorğu ünvanlayıb. Bununla bağlı qurumdan verilən cavaba görə, 19 gün ərzində it dişləməsi ilə bağlı 82 müraciət daxil olub:
“Gəncə Şəhər Birləşmiş Xəstəxanasının nəzdindəki tibb müəssisələrinə dekabr ayının 1-dən 19-dək it dişləməsi ilə bağlı 82 müraciət daxil olub”.
Bu hallar digər bir məsələni də müzakirəyə çevirir: sahibsiz itlər üçün sığınacaq niyə fəaliyyət göstərmir?
Bununla bağlı bir müddət öncə Gencexeber.az-ın sorğusuna cavab olaraq Gəncə şəhər İcra Hakimiyyətindən məlumat verilib ki, qurum Kəpəz Bələdiyyəsinin dəstəyi ilə sahibsiz küçə heyvanları üçün sığınacaq inşa etdirərək istifadəyə verib:
“Bu günədək “Yuva” adlı sığınacağa xeyli sahibsiz heyvan yerləşdirilib, peyvəndlənib və qısırlaşdırılıb. Daha sonra isə onlar təkrar şəhər ərazisinə buraxılıblar. Sığınacaq ictimai əsaslarla fəaliyyət göstərir. Burada eyni vaxtda yalnız 50 sahibsiz küçə heyvanı saxlamaq mümkündür. Hazırda sığınacaqda boş yer olmadığından əlavə sayda it yerləşdirmək mümkün deyil.
Sahibsiz küçə heyvanları ilə bağlı məsələ Gəncə Şəhər İcra Hakimiyyətinin diqqətində saxlanılır və məsələnin həlli istiqamətində müzakirələr davam etdirilir”.
