İmamzadə kompleksi Gəncə şəhərindən təqribən 7 km aralıqda, Qədim Gəncə xarabalığlarında, Gəncə Dövlət Tarix-Mədəniyyət Qoruğu ərazisində yerləşir. Kompleks imam Məhəmməd Baqirin VIII əsrdə vəfat etmiş oğlu İbrahimin məzarı üzərində ucaldılmış türbə ətrafında formalaşmışdır.
Gencexeber.az məlumat verir ki, kompleks sovet dövründə Azərbaycan ərazisində rəsmi dövlət qeydiyyatından keçmiş yeganə ziyarətgah olub.
Kompleksin əsas hissəsi türbə binası və qəbiristanlıqdan ibarətdir. Bununla yanaşı, türbənin ətrafında məscid, karvansara tipli evlər, başdaşları, sərdabə-türbə tipli qəbirüstü abidələr, hovuz və digər tikililər mövcuddur. Kompleksin ətrafında olan hasar daş və kərpicdən tikilib.
Gəncə xanı Cavad xan Ziyadoğlunun hakimiyyəti dövründə (1786–1804) türbədə əsaslı təmir işləri aparılıb. Bundan əlavə kompleksin ərazisi abadlaşdırılaraq, giriş hissəsinin divar və darvazalarının üzərində günbəz inşa olunub. 1878-ci ildə isə kompleksin bəzi hissələrini rus ordusunun general-mayoru İsrafil bəy Yadigarzadə öz hesabına bərpa edib.
İmamzadə kompleksi bir neçə dəfə dağıntılara məruz qalıb. Kompleks 1946-cı ildən İmamzadə piri kimi fəaliyyət göstərib. 1970-ci illərdə İmamzadənin idarə olunması Zaqafqaziya Müsəlmanları Ruhani İdarəsinin tabeliyinə verilib. Sovet dövründə də İmamzadədə təmir-bərpa işləri aparılıb.
Dəfələrlə aparılan yenidənqurma işləri kompleksin ilkin görünüşünü dəyişdirib. Son bərpa işləri burada 2010-2016-cı illərdə aparılıb.
Cavid Şəmiyev
