Gəncədə kişi ev satmaq üçün bacısına zəng edən qonşunu bıçaqlayıb.
Gencexeber.az-ın əldə etdiyi məlumata görə, hadisənin istintaqı Gəncə Ağır Cinayətlər Məhkəməsində hakim Abdulla Məmmədovun sədrliyi ilə keçirilib.
Belə ki, 1997-ci il təvəllüdlü Nicat Bayramov (ad şərtidir) Gəncə şəhərində anadan olub. Bir gün yeznəsi Eşqin zəng edərək, qonşuluqda olan Əsəd adlı şəxsin arvadına dəfələrlə yığmasını və buna görə bacısı ilə aralarında problem yarandığını deyib. Eşqin Nicata gəlib bacısını aparmağı tapşırıb. Nicat taksiyə minərək bacısıgilə gedib, Eşqindən qonşu Əsədin evinin yerini öyrənib. Əsədin evinə gedərək bacısına sataşdığı üçün onu 3 dəfə bıçaqlayıb.
Nicat Bayramov Azərbaycan Respublikası CM-nin 29,120.1-ci (qəsdən adam öldürməyə cəhd) maddəsi ilə təqsirləndirilib.
Məhkəmədə təqsirləndirilən şəxs qismində dindirilən Nicat Bayramov ona qarşı irəli sürülən ittiham üzrə özünü təqsirli bilib. O, ifadəsində göstərib:
“Ailədə bir bacı, bir qardaşıq. Əsəd ilə bacım Natəvanla rəsmi nikah bağlayaraq evləniblər. Bacımgil Göygöl rayonunda qalırlar. Dostlarımla kafedə oturub çay içirdim. Yeznəm Eşqin zəng edərək bacımla aralarında problem yarandığını dedi. Məni evlərinə çağırdı ki, bacımı aparım. Taksiyə minib onlara getdim. Evə girəndə Eşqin qonşuluqda yaşayan Əsəd adlı şəxsin davamlı Natəvana zəng elədiyini, bu səbəbdən aralarında daimi problem yarandığını bildirdi. Əsəbiləşib evdən çıxmaq istəyəndə Natəvanla Eşqin qoymadı. Eşqindən Əsədin evinin yerini bilib-bilmədiyini soruşdum. Eşqin evin bir qədər aralıda olduğunu dedi. Evdən çıxıb Əsədgilə getdik. Evdən çıxanda özümlə bıçaq götürdüm. Əsədə yaxınlaşıb “niyə bacıma zənglər edirsən” soruşanda Əsəd istehza ilə “bacına zəng etməmişəm, siz kimsiniz ki, mənim qapıma gəlmisiz?!” dedi. Əsədin inkar etməsindən və dediyi sözdən əsəbiləşib cəzalandırmaq üçün götürdüyüm bıçaqla onu bir neçə dəfə vurdum. Hadisədən sonra Bakıya gəldim. Daha sonra isə özüm polisə təslim oldum. Əməlimdən peşmanam, Əsədi öldürmək fikrim yox idi”.
Məhkəmədə dindirilmiş zərərçəkmiş Əsəd Əliyev (ad şərtidir) ifadəsində göstərib ki, Natəvana ev barəsində danışmaq üçün zəng edib:
“Nicatı əvvəldən tanıyıram, qonşu olmuşuq. Bacısı Natəvan və Natəvanın əri Eşqin bizlə qonşuluqda yaşayır. Natəvan və əri Eşqin məndən evimi Natəvanın atasına satmağı xahiş etdi. Evin qiyməti barədə danışmaq üçün Natəvan istifadəsində olan mobil nömrəsini mənə verdi. Natəvandan danışmağımızın problem olub-olmayacağını soruşmuşdum. O da mənə qonşu olduğumuzu dedi. Hadisə günü ev barədə danışmaq üçün Natəvana zəng etdim. O, telefonu açmadı. Bir neçə dəqiqə sonra Natəvanın telefonundan mənə zəng gəldi. Zəng edən yoldaşı Eşqin idi. Məndən arvadına niyə zəng vurduğumu soruşdu. Mən də nömrəni Natəvanın özü verdiyini, evi satmaq üçün zəng vurduğumu dedim. Sonra da hadisələr oldu”.
Şahid Natəvan Vəliyeva (ad şərtidir) məhkəmədə ifadə verməkdən imtina edib. Buna görə ibtidai istintaq zamanı verdiyi ifadəsi zalda elan edilib:
“Eşqinlə 2019-cu ildə ailə həyatı qurduq. Əvvəllər Göygöldə yaşayırdıq, sonra isə Gəncə şəhərinə köçdük. Əsədi də köçən zaman tanıdım. Əsəd evini satırdı, atamın alması üçün danışmaq məqsədilə nömrəmi verdim. Eşqinə zəng çatmayanda mənimlə əlaqə saxlamasını dedim. Əsədlə 2-3 dəfə telefonla əlaqə saxladıq və danışıqlarımız evlə bağlı olub”.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Nicat Bayramov 7 il 10 ay 15 gün müddətinə azadlıqdan məhrum edilib.
Fidan İlqar
