Gəncənin "Aqronavtlar" komandası ölkənin ən böyük intellektual yarışında regionlar üzrə ən yaxşı komanda seçilib.
Gencexeber.az məlumat verir ki, Bakı Konqres Mərkəzində respublikanın ən böyük bilik yarışı olan “İntellektual Klubların V Gənclər Liqası”nın final mərhələsi keçirilib. Birincilik "Yaşıl dünya naminə həmrəylik ili” çərçivəsində Azərbaycan Gənclər Fondunun dəstəyi, Gənclərin Maarifləndirilməsinə Dəstək İctimai Birliyinin təşkilatçılığı ilə baş tutub.
Oktyabr ayından etibarən start götürən və respublikanın 40-dan çox şəhər və rayonunu əhatə edən turnirin seçimlərində ümumilikdə 600-dən çox komanda və 5 mindən çox gənc öz intellektual gücünü sınayıb. Seçim turlarının yekununda regionlar üzrə ən yaxşı nəticə göstərən 12, paytaxt üzrə isə 20 komanda Bakıda keçirilən final mərhələsində kubok uğrunda mübarizə aparıblar.
Seçimlərdən uğurla keçən Gəncənin “Aqronavtlar” komandası final mərhələsinin yekununda regionlar arasında çempion adını qazanıb. Qalib komanda kubok, medal və dəyərli hədiyyələrlə mükafatlandırılıb.
Qeyd edək ki, ardıcıl beş ildir keçirilən turnirdə Gəncə şəhərini təmsil edən komanda artıq 3-cü dəfədir ki, regionlar çempionu adını qazanır.
