Gəncədə görkəmli kimyaçı alim vəfat edib.
Gencexeber.az məlumat verir ki, alim Fətağa İmaş oğlu Əbilov 11 oktyabr tarixində 85 yaşında dünyasını dəyişib.
Kimyaçı alim, fəlsəfə elmləri doktoru və müəllim Fətağa İmaş oğlu Əbilov cəmiyyət arasında müasir Gəncənin ziyalısı kimi tanınıb. Mərhumun nəşi bu gün İmamzadə qəbiristanlığında torpağa tapşırılacaq.
Gəncə Dövlət Universitetini fərqlənmə diplomu ilə bitirən Fətağa Əbilov əmək fəaliyyəti dövründə "Baş müəllim", "Metodist müəllim", "Maarif xadimi", "SSRİ maarif əlaçısı", eləcə də 2000 və 2002-ci illərdə “İlin müəllimi” adlarına layiq görülüb. Alim “Əmək Şöhrəti” ordeni ilə yanaşı, bir sıra medal və fəxri mükafatlara da təltif edilib.
F.Əbilov onlarla oçerk və hekayənin, müəllimlər üçün üç dərs vəsaitinin, şagirdlər üçün 12 dərsliyin, həmçinin "Məktəbdə yaşanan ömürlər" kitabının və 3 cildlik "Tale qisməti" romanının müəllifidir.
Fətağa İmaş oğlu həm də Azərbaycan Dövlət Aqrar Universitetində çalışıb, kimyanın tədrisində “Proqram-sxem” metodunun tətbiqinin təşəbbüskarı olub.
