Səhvdən heç kim sığortalanmayıb, sözsüz. Amma bəzi dövlət qurumları var ki, onlar səhv etməməlidirlər. Sadəcə olaraq, buna haqları yoxdur. Məsələn, İcra Hakimiyyətləri faktiki olaraq dövlətimizin birinci şəxsinin yerlərdəki təmsilçiləridir. Onların hər addımı, hər sözü məsuliyyətli olmalı, yüz ölçülüb, bir biçilməlidir. Ən azından bu strukturda çalışanlar ibtidai siyasi dünyagörüşünə malik olmalı, sosial şəbəkələrdəki rəsmi səhifələrindəki paylaşımlarına heç olmasa gündə 1 dəfə nəzər salmalıdırlar. Əlbəttə ki, məsuliyyət hissi varsa və buna savadları yetirsə. Amma...
Təqdim etdiyimiz şəkildə Goranboy Rayon İcra Hakimiyyətinin (İH) “Facebook” səhifəsindəki “inciləri” seyr etmək mümkündür. Çox təəssüf ki, belə mötəbər qurumda hələ də bilmirlər ki, Dağıstan – ölkə deyil. Və yəqin anlamırlar ki, bu respublikanı dövlət kimi təqdim etmək bizim şimal qonşularımızı – Rusiyanı heç də sevindirməyəcək.
Elə lüksemburqlular da bu paylaşımdan çətin ki, məmnun qalsınlar. Heyif ki, o boyda Goranboy rayonunda bu ölkənin adını düzgün yazan tapılmayıb.
Sonda isə ümid edirik ki, müvafiq cavabdeh şəxslər səhvlərindən nəticə çıxaracaq, anlayacaqlar ki, bu qəbildən olan kobud yanlışlıqlara ümumiyyətlə yol vermək olmaz.
Vüsal Əliyev
