Erməni təxribatı nəticəsində şəhid olan hərbçilərimizin vəfatından iki il ötür.
2022-ci ilin 12 sentyabrında Ermənistan silahlı qüvvələri Daşkəsən, Kəlbəcər və Laçın istiqamətlərində genişmiqyaslı təxribat törədib. Bu əməllərin qarşısını dərhal almaq məqsədilə bölmələrimiz tərəfindən təxirəsalınmaz tədbirlər görülüb. Baş vermiş döyüş toqquşmaları 14 sentyabr tarixinə qədər davam edib. Nəticədə Azərbaycan ordusunun 80 hərbi qulluqçusu şəhid olub.
Onlardan 3 nəfər – Erkin Ədalət oğlu Hüseynov, Asiman Mehman oğlu İmamverdiyev və Nihat Nicat oğlu Verdiyev Gəncə Şəhidlər Xiyabanında dəfn edilib:
- Erkin Ədalət oğlu Hüseynov 12 oktyabr 1998-ci ildə dünyaya gəlib. Ali təhsilini Bakı Dövlət Universitetində alıb. Leytenant rütbəsi daşıyan Erkin 12 sentyabr 2022-ci ildə Kəlbəcər rayonu ərazisində şəhidlik zirvəsinə yüksəlib. Şəhidimiz subay idi.
- Asiman Mehman oğlu İmamverdiyev 2 avqust 1988-ci ildə anadan olub. Azərbaycan Silahlı Qüvvələrinin giziri olan Asiman Vətən müharibəsi veteranı idi. O, 13 sentyabr 2022-ci ildə Daşkəsən rayonunda şəhidlik zirvəsinə ucalıb. Şəhidimiz evli idi, onun vətənə əmanət 2 övladı qalıb.
- Nihad Nicat oğlu Verdiyev 16 dekabr 2003-cü ildə Daşkəsən rayon Qaraqollar kəndində anadan olub. O, 2010-2021-ci illərdə Gəncə şəhərində yerləşən Kəlbəcər rayon 109 saylı tam orta məktəbdə təhsil alıb. Azərbaycan ordusunun əsgəri olan Nihad Laçın rayonunda şəhidlik zirvəsinə ucalıb. Şəhidimiz subay idi.
