Azərbaycan Respublikasının Ali Soveti 18 oktyabr 1991-ci ildə keçirilən iclasında “Azərbaycan Respublikasının Dövlət müstəqilliyi haqqında” Konstitusiya Aktını qəbul edib.
Gencexeber.az məlumat verir ki, həmin sənədə əsasən, Azərbaycan Respublikasının Ali Soveti Azərbaycan Milli Şurasının 28 may 1918-ci ildə qəbul etdiyi İstiqlal Bəyannaməsinə, Azərbaycan Respublikasının demokratik prinsiplərinin və ənənələrinin varisliyinə əsaslanır. Həmçinin “Azərbaycan Respublikasının dövlət müstəqilliyinin bərpası haqqında” Azərbaycan Respublikası Ali Sovetinin 30 avqust 1991-ci il tarixli Bəyannaməsini rəhbər tutaraq Konstitusiya Aktını qəbul edir və müstəqil Azərbaycan Respublikasının dövlət quruluşunun, siyasi və iqtisadi quruluşunun əsaslarını təsis edir.
1992-ci ilin may ayında Milli Məclis Azərbaycan Respublikasının Dövlət Himnini, bir müddət sonra isə Dövlət Bayrağı və Dövlət Gerbini təsdiq etdi.
2021-ci ildən 18 oktyabr tarixi, yeni adla – “Müstəqilliyin Bərpası Günü” kimi qeyd edilir.
