Xəbər verdiyimiz kimi, ötən gün Tovuz rayon Aşağı Quşçu kənd 1 nömrəli tam orta ümumtəhsil məktəbinin 2 sinfində pelet sobasının tıxanması tüstülэnməyə səbəb olub. Hadisə nəticəsində 70-dən artıq şagird və bəzi müəllimlər tüstüdən zəhərlənib. Onlara rayon xəstəxanasında yardım edilib və hər biri evə buraxılıb.
Hadisə ilə əlaqədar Tovuz rayon prokurorluğunda araşdırma aparılır.
Bəs bu gün məktəbdə dərslər bərpa olunubmu?
Gencexeber.az-a Qazax-Tovuz Regional Təhsil İdarəsindən məlumat verilib ki, Tovuz rayon Aşağı Quşçu kənd 1 nömrəli tam orta məktəbdə tədris prosesi bərpa olunub:
“Ötən gün sobalara baxış keçirilib, problem aradan qaldırılıb və istilik təmin olunub. Hazırda təhsil sektorunun nümayəndələri də məktəbdədir. Vəziyyət nəzarətdə saxlanılır", - deyə qeyd olunub.
