Valideynləri qayğılandıran məsələlərdən biri də uşaqların qısaboy olmasıdır. Bir çox xalqların nümayəndəsi ilə müqayisədə bizim uşaqlar xeyli qısaboyludur.
Bəs, qısaboyluluğun səbəbi nədir?
Bizim.media.аz xəbər verir ki, bu barədə Azərbaycan həkimləri İctimai Birliyinin sədri, həkim Aydın Əliyev danışıb.
Onun sözlərinə görə, bizdə belə fikir formalaşıb ki, valideynlərin boyu qısadırsa, övlad da qısa olmalıdır:
“Əslində, boy məsələsində genetik faktor var. Ancaq müasir tibb imkan verir ki, qısa boylu uşaqların boyu uzansın. Məsələn, tibb sübut edir ki, normal yuxu boyun uzanmasına kömək edir. Çünki uşaqlarda boy hormonu - somatotropinin orqanizmdə maksimal ifrazı axşam saat 22:00-dan gecə saat 02:00-a qədərdir. Bu saatlarda uşaq mütləq və mütləq yatmalıdır, yuxuda olmalıdır".
Həkim bildirib ki, gec yatan uşaqlarda boy inkişafı ləngiyir:
“Unutmayaq ki, uşaq yatanda, horizontal-üfüqi vəziyyətdə olanda daha asan böyüyür, ayaq üstə olanda qravitasiya boy artımına mane olur. Yaxşı olar ki, uşaqları axşam ac yatızdırasınız. Çünki yemək yeyəndə, xüsusən çörək və şirniyyat yeyəndə orqanizmdə insulin ifrazı artır, bu isə boy hormonuna antoqonist-əks təsir edərək boy artımını əngəlləyir. Uşaqlar mümkün qədər zülal-ət, yumurta, meyvə-tərəvəz, vitaminli və kalsiumlu qidalar - süd məhsullarını daha çox yeməlidir”.
Aydın Əliyev deyib ki, ət məhsullarının bahalaşması səbəbi ilə insanlarda zülal qəbulu azalıb:
“Bu da uşaqların boy artımına mənfi təsir göstərən faktordur. Əgər uşağınızın boyu sinif yoldaşlarından qısadırsa mütləq uşaq endokrinoloquna müraciət edin. Qoyun səbəbi araşdırılsın. Nəticədə boy artımına mane olan səbəb vaxtında aradan qaldırılacaq. Belə halda lazım gələrsə boy hormonu inyeksiyası təyin ediləcək”.
