“Paris-2024” Yay Olimpiya Oyunlarında medal qazanan idmançı təmtəraqla qarşılanıb. Gencexeber.az Kəpəz televiziyasına istinadən xəbər verir ki, idmançı Vətənə əli boş qayıtmayıb.
Söhbət yunan-Roma güləşçisi Həsrət Cəfərovdan gedir. O, ilk dəfə iştirak etdiyi 4 illiyin ən böyük yarışında bürünc medal qazanıb. İdmançının ata-baba yurdu Goranboya gəlişi coşqu ilə müşaiyyət edilib.
“Parisdə keçirilən olimpiadada 3-ə çıxdım. Ora qızıl üçün getmişdim. Amma şükür ki, Vətənə medalsız dönmədik. Çox əziyyət çəkmişdik, çox təlim məşq prosesi keçmişdik həmin yarış üçün. Yaxşı hiss edirdim özümü. Hər şey yolunda gedirdi. Amma yarımfinal görüşündə bir qədər hakimlərlə bağlı biraz problemlər oldu. Həm də qarşı idmançının biraz çirkin güləşməsi güləşimə mane oldu. Amma şükür ki, bayrağımızı qaldırdıq ucalara”, – deyə Cəfərov qeyd edib.
22 yaşlı idmançı son iki ildə özünü ən yaxşı tərfdən göstərməyi bacarıb. Ötən il və bu il Avropa çempionatının qalibi olub. 2023-cü ildə keçirilən Dünya çempionatının gümüş medalına sahiblənib. Qazandığı nəticələrə əsasən, Paris Olimpiadasına lisenziya əldə edib. Həsrət Cəfərovun məşqçisinin sözlərinə görə, yunan-Roma güləşindən yeganə idmançı Həsrət Cəfərovdur ki, əliboş qayıtmayıb.
Qeyd edək ki, idmançımızın son uğurları dövlətimizin başçısı tərəfindən yüksək qiymətləndirilib. Prezident İlham Əliyevin müvafiq sərəncamları ilə o, pul mükafatı ilə və 3-cü dərəcəli "Vətənə xidmətə görə" ordeni ilə təltif edilib.
