Gəncə tələbələri ölkə xaricində təltif olunublar. Bu haqda 15 avqust tarixində İcra Hakimiyyətinə istinadən məlumat veririk.
Azərbaycan Dövlət Aqrar Universitetinin (ADAU) tələbələri Kənd Təsərrüfatı Nazirliyi və İsrail Respublikasının Arava International Center for Agricultural Training (AICAT) proqramının təşkil etdiyi müsabiqələrdə iştirak ediblər. Burada 15 ölkə təmsil olunub.
Müsabiqədə ADAU tələbələri Xəyal Orucov, Turac Paşayev, Qəzənfər Həziyev və Vahid Məmmədov 4 ay ərzində hazırladıqları "Feast to Field, Compost Making Service" adlı layihəni təqdim ediblər. Onlar yüksək nəticə göstərərək maksimum mükafat məbləği olan 10 min ABŞ dollarına layiq görülüblər.
Həmvətənlərimiz, həmçinin nailiyyətləri sayəsində İsrail Respublikasında 11 aylıq təcrübə proqramında iştirak etmək hüququ qazanıblar.
Gənclər bunu bacaran ilk və yeganə Azərbaycan tələbələri kimi beynəlxalq müvəffəqiyyətə imza atmaqdan və ölkəmizin adını yüksək səviyyədə təmsil etməkdən böyük qürur duyduqlarını bildiriblər.
