Gəncədə yeni avtobuslar xəttə buraxılıb, lakin bu, ictimai nəqliyyatla bağlı problemi həll etməyəcək.
Gencexeber.az məlumat verir ki, Gəncədə nəhayət ki, yeni avtobuslar hərəkətə başlayıb - 20 nömrəli marşrut xətti üzrə iki yeni nəqliyyat vasitəsi istifadəyə verilib. Görünür ki, bu, sakinlər üçün yaxşı xəbərdir, amma.. Amma dəfələrlə sözügedən məsələ ilə bağlı redaksiyamıza daxil olan şikayətlərdən də aydın olur ki, əslində bu iki avtobus şəhərin əsas problemini - ictimai nəqliyyatın fəlakətli vəziyyətini həll etməyəcək.
Gəncə sakinlərinin sözlərinə görə, tez-tez xarab olan köhnə və sınıq-salxaq avtobuslar onların şəhər daxilində hərəkətini çətinləşdirir. Bir marşrut üzrə iki yeni avtobus ümmanda bir damcıdır və çətin ki, ümumi vəziyyəti dəyişsin.
Şikayətçilərin çoxsaylı müraciətlərini bir araya toplasaq tələblər bundan ibarətdir: Gəncədə ictimai nəqliyyat xidməti sistemi çoxdan köklü dəyişikliklər tələb edir - avtobus parkı modernləşdirilməli, xidmət keyfiyyəti yüksəldilməli, yeni, daha səmərəli marşrutlar yaradılmalıdır.
Qeyd edək ki, iki ay öncə 20 nömrəli marşrut xəttinə 18 yeni avtobus istismara buraxılıb.
Cavid Şəmiyev
