Gəncədə kişi sayıqlığı sayəsində binanın damından düşən fasad qırıntılarından yayına bilib.
Gencexeber.az məlumat verir ki, hadisə iki həftə öncə şəhərin Dədə Qorqud küçəsində (Köhnə Yevlax avtovağzalı) yerləşən “Nicat Aptek”in qarşısında baş verib. Belə ki, beşmərtəbəli binanın önündən keçən 1969-cu il təvəllüdlü Arif Nəzərovun üzərinə tikilinin fasadından ayrılan hissələri tökülüb. Kişi son anda bədbəxt hadisədən yayınmağı bacarıb.
A.Nəzərovun oğlu Nicat müvafiq videogörüntünü redaksiyamıza təqdim edib. Kadrlarda atasının sayıqlığının onun həyatını necə xilas etdiyi görünür.
Qeyd edək ki, bu vəziyyət şəhərdəki köhnə tikililərin fasadlarının təmir edilməsi zamanı aparılan işlərin təhlükəsizlik tələblərinə nə dərəcədə cavab verməsi sualları doğurur. Hətta bu səbəbdən 2022-ci ilin martın 19-da Nizami Gəncəvi prospektində xoşagəlməz hadisə də baş verib. Güclü külək nəticəsində yolun kənarında dayanan ana və azyaşlı qızının üzərinə evin divarına çəkilmiş üz daşları tökülüb. Həmin şəxslər ağır vəziyyətdə xəstəxanaya çatdırılıb.
Xatırladaq ki, bir müddət öncə binalardan birinin damından iri dəmir parçasının asılı vəziyyətdə qalması haqda xəbər vermişdik.
