Azərbaycan Basketbol Liqasının ilk turunda “Gəncə” “Lənkəran”ı məğlub edib.
Gencexeber.az məlumat verir ki, Lənkəran Olimpiya İdman Kompleksində baş tutan görüşdə “Gəncə” komandası 90:75 hesabı ilə inamlı qələbə qazanıb.
Komandanın baş məşqçisi Halil Atlı oyunla bağlı fikirlərini klubun mətbuat xidməti ilə bölüşüb. Türkiyəli mütəxəssis ilk qələbənin komanda üçün əhəmiyyətli olduğunu bildirib:
"Çempionata qələbə ilə başlamaq çox önəmli idi. Xüsusən də buna səfərdə nail olmaq bizi sevindirir. Mövsüm öncəsi yoxlama oyunlarında çatışmazlıqları görmüşdük. Zəif cəhətləri düzəldərək "Lənkəran"la matça hazırlaşmışdıq. Oyunçulara sərgilədikləri mübarizəyə görə təbriklərimi çatdırıram. Köməkçilərimə də təşəkkür edirəm. Səhvlərsiz çıxış etdik. Əsas oyunçularımızdan Cəbrayıl Əkbərov zədəlidir. O, bizim üçün önəmli oyunçudur. İnşallah, oyundan-oyuna, gündən-günə daha da inkişaf edəcəyik".
