Gəncə şəhər 30 saylı körpələr evi-uşaq bağçasının vəziyyəti valideynlərdə ciddi narahatlıq doğurur.
Gencexeber.az məlumat verir ki, bağça Poçt qəsəbəsində yaşayış binasının birinci mərtəbəsində fəaliyyət göstərir. Valideynlər iddia edirlər ki, azyaşlı uşaqlar bir çox problem, o cümlədən bağçanın qeyri-qənaətbəxş vəziyyəti ilə üzləşirlər, eləcə də balacaların təmin olunduqları qidanın keyfiyyəti də qeyri-kafidir.
Onların sözlərinə görə, giriş qapısı, dəhliz, tavanlar, döşəmə və divarlar onillər ərzində təmir edilməyib. Bundan başqa, kanalizasiya borularından ətrafa olduqca pis qoxu yayılır. Hasarın bir hissəsini isə külək uçurub. Bərpa işləri aparmaq əvəzinə həmin yer şiferlə örtülüb.
Valideynlərin övladlarının hansı qida ilə təmin olunduğu barədə məlumat almaq istəyi də bağça rəhbərliyi tərəfdən rədd edilir: “Uşaqlardan hansı yeməklərin verildiyini soruşanda, onlar ancaq makaron, kartof və qatıq yediklərini deyirlər. Nahar vaxtı video çəkmək xahişi ilə dəfələrlə tərbiyəçilərə müraciət etsək də, onlar internetin olmadığını əsas gətirərək bizə rədd cavabı veriblər”.
Redaksiyamız mövcud vəziyyətlə bağlı uşaq bağçasının müdiri Xanım Heydərova ilə əlaqə saxlayıb. Yalnız dəhlizinin təmirə ehtiyacı olduğunu söyləyən təhsil ocağının rəhbəri Gəncə-Daşkəsən Regional Təhsil İdarəsində bu barədə məlumatın olduğunu bildirib. Həmçinin X.Heydərova uşaqların təmin olunduğu qida rasionunun zəif olması barədə iddiaları inkar edib:
“Bağçada otaqlar təmirli və müəssisənin fəaliyyət göstərməsi üçün tam yararlıdır. Təmir-bərpa işləri yalnız dəhlizdə görülməlidir. Bu barədə aidiyyəti üzrə məlumat verilib, lakin təmir işlərinin nə vaxt görüləcəyi barədə bizə məlumat verilməyib. Ümumiyyətlə bu cür işlər şəhər ərazisində mərhələli şəkildə həyata keçirilir. Hesab edirəm ki, vaxtı çatanda bizim bağçada təmir ediləcək.
Uşaqların rasionuna gəlincə, Təhsil Nazirliyi tərəfindən təsdiq edilən menyular vaxtında verilir, yəni heç bir problem yoxdur”.
