Bu gün Ümummilli Lider Heydər Əliyevin vəfatından 21 il keçir.
Gencexeber.az xatırladır ki, Heydər Əlirza oğlu Əliyev 1923-cü il mayın 10-da Naxçıvanda anadan olub.
1939-cu ildə Naxçıvan Pedaqoji Texnikumunu bitirdikdən sonra indiki Azərbaycan Dövlət Neft və Sənaye Universitetində təhsil alıb. Lakin İkinci Dünya müharibəsinin başlanması ilə əlaqədar təhsilini bitirə bilməyib.
O, 21 yaşında təhlükəsizlik orqanlarında çalışmağa başlayıb. 1967-ci ildə Azərbaycan SSR Nazirlər Soveti yanında Dövlət Təhlükəsizliyi Komitəsinin sədri vəzifəsinə təyin edilib. 1969-cu ildə Azərbaycan Kommunist Partiyası Mərkəzi Komitəsinin birinci katibi seçilib. 1982-ci ilin dekabrında Sovet İttifaqı Kommunist Partiyası Mərkəzi Komitəsi Siyasi Bürosunun üzvü seçilən Heydər Əliyev SSRİ Nazirlər Soveti sədrinin birinci müavini vəzifəsinə təyin edilib, SSRİ-nin rəhbərlərindən biri olub.
1987-ci ildə Heydər Əliyev Sovet İttifaqı Kommunist Partiyası Mərkəzi Komitəsinin sonuncu Baş katibi Mixail Qorbaçovun siyasətinə etiraz edərək, tutduğu vəzifələrdən imtina edib.
3 oktyabr 1993-cü ildə və 11 oktyabr 1998-ci ildə ümumxalq səsverməsi nəticəsində Azərbaycan Respublikasının Prezidenti seçilib.
Heydər Əliyevin rəhbərliyik etdiyi Azərbaycan regionun güclü dövlətinə çevrilib.
Ulu öndər Heydər Əliyev 12 dekabr 2003-cü ildə ABŞ-nin Klivlend klinikasında vəfat edib və Birinci Fəxri xiyabanda dəfn olunub.
