Goranboy rayonunda müəllimin dərs dediyi məktəbdən çəkdiyi görüntülər sosial platformalarda istifadəçilərin narazılığına səbəb olub.
Avtosfer.аz xəbər verir ki, rayonun Bağçakürd kənd orta məktəbinin sinif otağında çəkilən görüntülərdə müəllim şagirdlərin hər birinin bu xalqın gələcəyi olduğunu vurğulayaraq sinifdəki acınacaqlı vəziyyəti göstərib. Divarlar uçuq-sökük, pəncərələrdə şüşə yox, əvəzinə sellofan var, sinif cəmi 1 lampa ilə işıqlandırılır. Ən qorxunc vəziyyət isə, o deşik, cırıq sellofanın hava keçirməsinə baxmayaraq, soyuq günlərdə sinfin kustar üsulla düzəldilən soba ilə isidilməsidir. Böyük ehtimal o sobanı da şagirdlərin valideynləri ya özləri düzəldib, ya da öz hesablarına kiməsə düzəltdiriblər. Maraqlısı odur ki, tövlə şəraitində tədris alan məktəblilərin qarşısındakı partalar köhnə olsa da, təmiz və səliqəli saxlanılıb.
Təbii ki, məktəbdəki vəziyyətin belə olmasının məsuliyyəti başlıca olaraq Elm və Təhsil Nazirliyinin, daha sonra isə Goranboy rayon Təhsil Şöbəsinin rəhbərinin üzərinə düşür. Nazirliyin və bölgə nümayəndəliyinin bu məsələni görməzdən gəlməsi bir yana, 5 ildən bir ortaya çıxıb rayon sakinlərilə görüşdüyünü bildirən, o ərazinin parlamentdəki təmsilçisi olmağa haqq qazanan şəxslər belə problemin həlli ilə bağlı heç nə etməyib.
Sakinlər isə aidiyyəti qurumların, şəxslərin məktəbdə yaranan bərbad vəziyyətin tezliklə düzəldilməsini, yeni məktəb binası, yaxud mövcud məktəbin ən azından təmir edilməsini tələb edir.
