Gəncə və Qərb bölgəsi üzrə rus icmasının sədri Valeri Kozin vəfat edib.
Gencexeber.az İcra Hakimiyyətinə istinadən məlumat verir ki, Valeri Misiroviç Kozin 78 yaşında dünyasını dəyişib. O, uzun illər şəkər xəstəliyindən əziyyət çəkirdi.
Valeri Misiroviç Kozin 23 noyabr 1946-cı ildə Samux rayonunda anadan olub. Orta məktəbi bitirdikdən sonra Ukraynada xüsusi aviasiya məktəbinə daxil olub. 1984-cü ildə Azərbaycan Kənd Təsərrüfatı Akademiyasının (indiki ADAU) mexanizasiya fakültəsini, 1990-cı ildə isə Bakı Ali Partiya Məktəbini bitirib. Daha sonra Leninqrad Mülki Aviasiya İnstitutunda aspirantura üzrə təhsil alıb, akademiyanın fəal üzvlərindən olub.
Fəaliyyəti dövründə bir çox mükafatlara layiq görülüb.
Belə ki, o Prezident İlham Əliyevin müvafiq Sərəncamına əsasən “Tərəqqi” , "Mülki aviasiya sahəsində xidmətlərə görə" medalları ilə təltif olunub. Əlavə olaraq Rusiya Federasiyası tərəfindən I dərəcəli “Aleksandr Nevski” ordeni, “Şərəf və ləyaqət” ordeni, “Rusiyanın fəxri vətəndaşı” adı ilə də mükafatlandırılıb.
1998-ci ildən Gəncə və Qərb bölgəsi üzrə rus icmasının sədri vəzifəsində çalışıb. Ailəli idi, 3 övladı, 6 nəvəsi var.
