Gəncədə bir nəfər alkoqollu içkinin təsiri altında xuliqanlıq edib.
Qaynarinfo-nun verdiyi məlumata əsasən, hadisə Azərbaycan Dəmir Yollar QSC-nin Gəncə dəmiryolu vağzalının gözləmə zalında qeydə alınıb. 26 yaşlı Mehman C. tikilinin şüşəsini sındırıb.
O, polis əməkdaşları tərəfindən saxlanılıb. Mehmanın barəsində İnzibati Xətalar Məcəlləsinin 510 (xırda xuliqanlıq) və 535.1-ci (polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə) maddələri ilə protokol tərtib olunub və iş məhkəməyə göndərilib.
Məlum olub ki, o, 10 bakal pivə içərək, dəmiryolu vağzalına gedib və siqaretlə gözləmə zalına daxil olub. Vağzalda zal gözətçisi işləyən şəxs ona irad bildirdiyinə görə təqsirləndirilən şəxs əsəbi halda gözləmə zalının şüşəsini təpiklə vuraraq sındırıb. Vətəndaş hadisəni törətdiyinə görə peşman olduğunu bildirib.
Məhkəmənin qərarı ilə Mehman C. 20 gün müddətə həbs edilib.
