Mağazalardan alınan qidalardan müxtəlif həşəratların çıxması halları ara-sıra baş verir. Bu dəfə də sözügedən hadisə Gəncə şəhərində olub.
Gencexeber.az-a bu barədə şikayətçi Həqiqət Abbasova məlumat verib.
Şikayətçi xanım iddia edir ki, evinin yaxınlığında yerləşən balaca bir mağazadan aldığı “Bizim Ailə” günəbaxan tumlarının içərisindən qovurulmuş halda balaca çəyirtkə çıxıb.
“Məhsulun üzərində qeyd olunan tarixə görə, istifadə müddəti bitməyib, yəni yararlı məhsuldur. Ancaq içərisindən çıxan həşərat adamı həm qorxudur, həm də iyrəndirir. Burda mağaza sahibinin heç biri günahı yoxdur, ağzı bağlı məhsuldur. Bu məsələdə istehsalçı şirkət məsuliyyət daşıyır. Bir müddət əvvəl də başımıza bu cür hadisə gəlmişdi, böyük supermarketdən aldığımız şokoladın içindən bit çıxmışdı. O zaman da mağazaya heç bir etirazımızı bildirməmişdik, günah onlarda yox, məhsul istehsal edən şirkətdədir. Müəssisələr bu kimi halların baş verməməsi üçün diqqətli və məsuliyyətli iş görməlidirlər”, - deyə şikayətçi bildirib.
