Gəncədə İlqar Əliyevin 60 illik yubileyi qeyd olunub.
Gencexeber.az-ın məlumatına görə, Gəncə–Daşkəsən Regional Gənclər və İdman İdarəsinin təşkilatçılığı ilə Respublikanın Əməkdar məşqçisi, Fəxri Bədən Tərbiyəsi və İdman işçisi İlqar Səməd oğlu Əliyevin 60 illik yubileyinə həsr olunmuş təntənəli tədbir keçirilib.
Tədbirdə Şöhrət ordenli Elçin Zeynalov, 1 saylı Uşaq-Gənclər İdman-Şahmat Məktəbinin direktoru Ramil Qasımov, 2 saylı Uşaq-Gənclər İdman-Şahmat Məktəbinin direktoru Asif Həsənov, Gəncə–Daşkəsən Regional Gənclər və İdman İdarəsinin rəisi Elvin Quliyev, təqaüddə olan polis polkovniki Yaşar Hüseynov, "Patriotnyus" kanalının yaradıcısı, polkovnik Ceyhun Əliyev, Gəncə İdman Liseyinin direktoru Mehman Allahverdiyev, Azərbaycan Uşu Federasiyasının qərb bölgəsi üzrə sədr müavini, beynəlxalq dərəcəli hakim Fəxri Namazlı, eləcə də bir çox dünya və Avropa çempionları iştirak ediblər.
İlqar Əliyev qərb bölgəsində kikboksinq və digər döyüş növlərinin ilk təbliğatçılarından biri kimi tanınır. O, indiyədək 14 dünya çempionu, onlarla Avropa və Asiya çempionu yetişdirib. Onun tələbələri ölkəmizə 200-dən çox qızıl, gümüş və bürünc medallar qazandırıblar. İlqar Əliyev hazırda Azərbaycan Döyüş Növləri Assosiasiyasının Qərb bölgəsi üzrə rəhbəri kimi fəaliyyət göstərir və kikboksinq, muay-tay, uşu-sanda, MMA üzrə dünya və Avropa miqyaslı idmançıların hazırlanmasına töhfə verir.
Bu yubiley tədbiri həm İlqar Əliyevin uzun illər gənclərin idmana cəlb olunması və uğurlu idmançılar yetişdirilməsi istiqamətində gördüyü işlərin, həm də Gəncə idman ictimaiyyətinin ona olan ehtiramının təzahürü kimi qiymətləndirilib.
