Gəncə Dövlət Universitetinin (GDU) yataqxanası ilə bağlı tətbiq edilən yeni sərt qərarlar tələbələr arasında şiddətli narazılığa səbəb olub.
Gencexeber.az məlumat verir ki, iddialara görə yataqxanada yemək qızdırmaq artıq qəti qadağandır - bu məqsədlə tələbələrdən elektrik sobaları müsadirə edilib. Üstəlik, gənclərə soyuducularda evlərindən göndərilən milli mətbəximizə aid yeməklərin saxlanması da qadağan edilib. Bu da acınacaqlı nəticələrə gətirib çıxarır: yemək kənarda tez xarab olur və tələbələr normal qidalanmadan məhrum olurlar.
“Niyə valideynlərimiz tərəfindən bizə göndərilən təmiz ev yeməklərindən məhrum qalmalıyıq? Çoxumuz məcburən yataqxananın yeməkxanasında, yaxud universitetdən kənarda mənşəyi bilinməyən, lakin ucuz satılan yeməkləri yemək məcburiyyətində qalırıq. Həm də maliyyə çətinliyi ilə üzləşən tələbələr indi diqqətlərini təhsillərinə yönəltmək əvəzinə iş axtarmalıdırlar", - tələbələrin redaksiyamıza ünvanladıqları şikayətdə deyilir.
Əlavə edilib ki, yataqxananın əməkdaşları yeni qaydalara əməl olunmasına nəzarət etmək üçün istənilən vaxt otaqlara daxil olaraq bir növ “reydlər” keçirirlər. Tələbələr etirazlarını bildirdikləri təqdirdə isə onlara kobud şəkildə “xoşuna gəlmir, yataqxanadan çıx” cavabı verilir. Həmçinin “məsləhətə” əməl edərək yataqxananı tərk etmək qərarına gələn gənclərə semestr başlamazdan əvvəl ödədikləri 5 aylıq kirayə haqqının qalığının geri qaytarılmayacağı da bildirilib.
