Gəncədə müəssisələrdən biri səhmlərini satıb.
Fеd.аz-ın verdiyi məlumata əsasən, söhbət “Gəncə-Qənnadı” ASC-dən gedir. Müəssisənin dövlətə məxsus və nizamnamə kapitalının 30,03 faizini təşkil edən səhmlərinin satışı üzrə investisiya müsabiqəsi yekunlaşıb.
Müsabiqənin sonunda təkliflər qiymətləndirilib və daha əlverişli şərtlər təklif edən fiziki şəxs Mahir Abdulla oğlu Abdullayev investisiya müsabiqəsinin qalibi elan olunub. Onunla imzalanmış alqı-satqı müqaviləsinə əsasən, investor dövlət büdcəsinə 450 000 manat vəsait köçürməli və əlavə olaraq 1 il ərzində müəssisədə 450 000 manat həcmində İnvestisiya Proqramını icra etməlidir. Layihə çərçivəsində ASC-də vafli bişirən sobanın, müxtəlif növ konfetlərin istehsalı üzrə avtomatik xəttin və onların bükülməsi üçün maşınların alınıb quraşdırılması, müəssisənin dam örtüyü və laboratoriyasının təmir olunması, yeni avadanlıqların alınması planlaşdırılır.
Müsabiqə qalibi tərəfindən investisiya qoyuluşları nəticəsində müəssisədə ən azı 15 yeni iş yerinin yaradılması nəzərdə tutulur.
