Gəncə şəhərində Nizami Gəncəvi prospektində Gəncəçay üzərindəki körpünün girişində avtomobillər yolun hərəkət hissəsində park edilir.
Gencexeber.az məlumat verir ki, həmin maşınlar gediş-gəlişi əhəmiyyətli dərəcədə çətinləşdirir. Ərazidən keçən nəqliyyat vasitələri park edilən avtomobillərdən yayınmalı olurlar ki, bu da yolu bir zolağadək darlaşdırır. Məsuliyyətsiz parklanma tıxaclara və sürücülərin vaxt itkisinə səbəb olur. Yol hərəkəti qaydalarına olan bu laqeydlik onlara stress yaşatmaqla yanaşı, ictimai nəqliyyatdan istifadə edən sərnişinləri də özündən çıxarır.
Sakinin sözlərinə görə, bu hal uzun müddətdir davam edir: “Yolun bu hissəsində vəziyyət xüsusilə səhər və axşam saatlarında çətinləşir. Burada avtomobillərin sayı artır və bu halda sıxlıq əmələ gəlir. Sürücülər əsəbiləşməyə başlayanda isə xoşagəlməz mənzərələrlə qarşılaşmalı oluruq”.
