Gəncədə bağçaların birində uşaqların qidalanmasının zəif olması ilə bağlı yayılan iddialar təkzib edilib.
Bir müddət öncə Gəncə şəhər 30 saylı körpələr evi-uşaq bağçasında balacaların təmin olunduqları qidanın keyfiyyətinin qeyri-kafi olması ilə bağlı redaksiyamıza iddia daxil olub. Valideynlərin sözlərinə görə, uşaqlardan hansı yeməklərin verildiyi soruşulanda, onlar ancaq makaron, kartof və qatıq yediklərini deyiblər. Tərbiyəçilərdən nahar vaxtı video çəkmək istənildikdə, onlar internetə çıxışın olmadığını əsas gətirərək, bundan imtina ediblər.
Gencexeber.az məlumat verir ki, sözügedən məsələ ilə əlaqədar redaksiyamız Gəncə şəhərində Gəncə–Daşkəsən Regional Təhsil İdarəsinin tabeliyində olan 42 bağçaya hazır qida və ya ərzaqların çatdırılmasını həyata keçirən “TAİS - İKF” MMC-nin ambar nəzarətçisi vəzifəsində çalışan əməkdaşı Sübhan Mustafayevlə danışıb. Onun sözlərinə görə, iaşə müəssisəsi Təhsil Nazirliyi ilə bağlanılan müqavilə əsasında fəaliyyət göstərir və bağçaları hazır qida, eləcə də ərzaqlarla təmin edir. Əlavə edilib ki, şirkətin əməkdaşları həm də yeməklərin uşaqlara verilməsinə də nəzarət edirlər. Qeyd olunub ki, bu cür yoxlamalar təhsil ocaqlarının rəhbərlərinin və çalışanlarının xəbərləri olmadan həftədə bir dəfə olmaqla baş tutur:
“Bizim əməkdaşlar həftədə bir dəfədən az olmamaqla bağçaları gəzərək uşaqlara yeməklərin çatdırılmasına nəzarət edirlər. Bundan əlavə, hər bir bağça gündəlik bişirilən yeməklərin şəkillərini də bizə göndərir. Beləliklə biz əmin ola bilirik ki, qida məhsulları uşaqlara verilib. Ayrıca Təhsil İdarəsi təftişlər də həyata keçirir. Yəni valideynlərin iddiaları tamamilə reallığı əks etdirmir”.
S.Mustafayevdən hansı əsaslarla şirkət əməkdaşlarının dövlət bağçalarında yoxlamalar apardığını və Təhsil Nazirliyi ilə bağlanmış müqavilədə buna dair öhdəliyin olub-olmamasını soruşduqda, o, müqavilədə belə bir bənddən xəbərdar olmadığını söyləyərək "qida ilə biz təmin ediriksə, biz də nəzarət etməliyik ki, yeməklər sırf uşaqlara verilsin” ifadəsini əlavə edib. Həmsöhbətimiz həmçinin qeyd edib ki, buna dair tapşırığı şirkətin rəhbərliyi verib.
