Bu gün Bakının işğaldan azad olunmasından 106 il ötür . 1918-ci ildə qazanılmış bu zəfər Azərbaycan Xalq Cümhuriyyətinin tarixinə mühüm hadisə kimi yazılıb.
Həmin ildə Nuru Paşanın rəhbərlik etdiyi Qafqaz İslam Ordusu və Azərbaycan Korpusu Bakıya daxil olaraq şəhəri erməni-bolşevik işğalından azad edib. Beləliklə, həm Azərbaycanın müstəqilliyi təmin olunub, həm də ermənilərin, bolşeviklərin Bakı və ətraf rayonlardakı ağalığına son qoyulub.
Bakının azad olunmasında Xüsusi Azərbaycan Korpusunun komandiri, general-leytenant Əliağa Şıxlinski Nuru Paşa ilə bərabər iştirak edib.
Bakı şəhərinə hücum sentyabrın 13-dən 14-nə keçən gecə saat 01:00-da başlayıb.
15 sentyabr 1918-ci ildə Bakı işğalçılardan azad olunub, 1 gün sonra isə indiki Sahil bağında Qafqaz İslam Ordusu və Azərbaycan qoşunlarının rəsmi paradı keçirilib. Paytaxtda hadisələrlə bağlı xilaskar türk əsgərinin şərəfinə abidə də ucaldılıb.
Bu qələbədən sonra Azərbaycan Xalq Cümhuriyyəti hökumətinin paytaxtı sentyabrın 17-də Gəncə şəhərindən Bakıya köçürülüb.
Bakı şəhərinin azad edilməsi zamanı 800-1000 nəfər türk hərbçisi şəhid olub.
