2005-ci ildə Prezident İlham Əliyevin Sərəncamı ilə 13 oktyabr Dəmiryolçuları Günü kimi qeyd edilir.
Gencexeber.az məlumat verir ki, Azərbaycanda dəmir yolu nəqliyyatının tarixi 19-cu əsrin sonlarından, 1878-ci ildə ilk polad xəttin çəkildiyi vaxtdan başlayıb. 1880-ci ildə isə Bakı-Suraxanı-Sabunçu xətti açılıb.
SSRİ Nazirlər Sovetinin 1955-ci il 11 oktyabr qərarı ilə 1955-ci ildən Azərbaycan dəmiryolu müstəqil qurum kimi fəaliyyət göstərməyə başlayıb. İnkişafının zirvəsində 70-80-ci illərdə Heydər Əliyevin sayəsində yeni stansiyalar, xətlər tikildi, eləcə də yükdaşımaların həcmi 80-90 milyon tona çatıb.
1990-cı illərdə SSRİ-nin dağılmasından sonra dəmir yolu sənayesi tənəzzülə uğrayıb, lakin Heydər Əliyevin hakimiyyətə qayıdışı ilə bərpa olunub. İdarəetmə vasitələri modernləşdirilib, sərnişindaşıma üçün yeni vaqonlar alınıb. Həmçinin 1996-cı ildən etibarən tranzit yüklərin dövriyyəsi durmadan artır.
Heydər Əliyev tərəfindən başlanmış və İlham Əliyev tərəfindən davam etdirilən iqtisadi islahatlar dəmir yollarının inkişafına öz töhfəsini verib. 2007-ci ildə Bakı-Tbilisi-Qars layihəsi üzrə sazişin imzalanması regionda nəqliyyat əlaqələrini gücləndirən tarixi hadisəyə çevrilib.
Dövlət başçısının “Azərbaycan Dəmir Yolları” QSC-nin yaradılması haqqında 2009-cu il 20 iyul tarixli Sərəncamı infrastrukturun müasirləşdirilməsinə yönəlib. Hazırda şirkət əhalinin və dövlət qurumlarının nəqliyyat ehtiyaclarını ödəməklə beynəlxalq layihələrdə fəal iştirak edir.
